Exile a Baha'i citizen from Sanandaj to Minab
رۆژی یەك شەممە ۲٥ ی خاكەلێوەی ۲۷۱۹ی كوردی، زەبیحوڵا رەئوفی، هاوڵاتی بەتەمەنی بەهایی، كە خەڵكی شاری
سنەی رۆژهەڵاتی كوردستانە، بە مەبەستی بەسەر بردنی ماوەی سزای دورخستنەوەكەی بەرەو پارێزگای هۆرموزگان بەڕێكەوت.
زەبیحوڵا رەئوفی تەمەن ۷۰ ساڵ، مانگی گەلاوێژی ساڵی رابردوو بە تۆمەتی چالاكی بانگەشەكاری دژی رژێمی ئێران، لە لایەن لقی چواری دادگای گشتی ئێران لە سنەوە، سزای ساڵێك زیندانی و ساڵێكیش دورخستنەوە بۆ شاری میناب لە پارێزگای هۆرموزگانی بەسەردا سەپێنرابوو.
ئەو هاوڵاتیە بەهاییە لە خەرمانانی ساڵی ۲۷۱٥ لە لایەن هێزە ئەمنیەكانەوە دەستبەسەركرابوو، پاش تێپەڕبوونی شەش رۆژ بە دانانی بارمتەی ۳۰ملیۆن تمەنی ئازادكرابوو، دواتر لە لایەن لقی چواری دادگای پێداچوونەوەی سنە، بەتۆمەتی بانگەشەكردن لە دژی رژێمی ئێران سزای زیندان و دورخستنەوەی بەسەردا سەپێنرابوو.
رۆژی ۹ ی خەزەڵوەری ۲۷۱٨زەبیحوڵا رەئوفی بۆ تێپەڕكردنی ماوەی یەك ساڵ سزای زیندانەكەی چووبوە گرتوخانەی سنە و رۆژی ۲۷ ی رەشەمێی هەمان ساڵ لە چوار چێوەی ئازادكردنی پێشوەختەی زیندانیانی سیاسی ئازادكرابوو.
هەفتەی رابردوو بە مەبەستی جێبەجێ كردنی سزای دورخستنەوەكەشی لە لایەن لقی چوار جێبەجێكردنی سزاكانی دادگای ئێران لە مینابەوە، زەبیحوڵا رەئوفی ئاگاداریەكی پێگەیشتبوو.
جێی باسە ئەو هاوڵاتیە بەهایە، ساڵی ۲۷۰٨ یش بە تۆمەتی بانگەشەكردن لە دژی رژێمی ئێران دەستگیر و سزای یەك ساڵ زیندانی بەسەردا سەپێنرابوو، كە دواتر سزاكەی بۆ شەش مانگی زیندان لە تویسركان گۆڕدرابوو.
بەهاییەكان یەكێك لەو پێكهاتە ئایینیانەن كە لە لایەن دەسەڵاتی كۆماری ئیسلامیەوە شوێنكەوتوانی ئەو ئایینە رووبەڕووی زۆرترین گوشار و راوەدونان، دەستبەسەرداگرتنی موڵك و ماڵ و تەنانەت تێكدانی گۆڕستانەكانیشیان دەبنەوە و بەشێك لە بەهاییەكان دانیشتووی پارێزگاكانی رۆژهەڵاتی كوردستانن.
كۆمەڵەی مافی مرۆڤی كوردستان
No comments:
Post a Comment