NNSROJ: لە ئەنجامی مووشەكباران كردنی كەمپی لیبرتی لە نزیك بەغدا، شوێنی مانەوەی ئەندامانی رێکخراوی موجاهیدین، دەیان ئەندامی ئەو رێكخراوەیە كوژران و زیانێكی زۆریش بەر كەمپەكە كەوت.
سەرچاوەیەک لە ناو كەمپەكە بە ناوەندی نوچە و شرۆڤەی رۆژی راگەیاند، شەوی پێنجشەممە لە سەر هەینی، زیاتر لە ۶۰ مووشەک ئاراستەی كەمپەكەیان كراون و بە هۆی ئەو هێرشەوە لانیكەم ۲۰ كەس كوژراون و چەندین كەسی تر برینداربوون.
هەمان سەرچاوە وتیشی: لە ئەنجامی ئەو هێرشەدا سەرجەم خانووەكانی ناو كەمپەكە زیانیان بەركەوتووە و دەتوانم بڵێم كەمپەكە خاپوور بووە.
شوورای میللی موقاومەت، لقی سیاسیی رێکخراوی موجاهدین رایگەیاندووە کە بە لانیکەمەوە ٢٣ کەس ژیانیان لەدەست داوە.
رێكخراوی موجاهیدین رێكخراوێكی بەرهەڵستكاری حكوومەتی ئێرانە و دوای دەستپێكردنی شەڕی چەكداری دژی كۆماری ئیسلامیی ئێران لە ساڵی ۱۹۸۰، بنكە و بارەگاكانی خۆی لە عێراق جێگیركرد.
ئەندامانی موجاهیدینی خەلق پێش ئەوەی بە زۆرەملێ بەرەو كەمپی لیبرتی راگوێزرێن، لە كەمپی ئەشەرف لە پارێزگای دیالە دەمانەوە.
دانیشتوانی ئەو كەمپە باس لەوەدەكەن چەندین جاری تر لە لایەن چەكدارە شیعە عێراقییەكانەوە، كە لایەنگری حكوومەتی ئێرانن هێرشیان كراوەتە سەر و حكوومەتی عێراقیش بە كەمتەرخەم ناودەبن لە پاراستنی ژیانیان.
م.ا
م.ا
