لە راپۆرتێكدا كە لە سەر ماڵپەڕی كۆمەڵەی مافی مرۆڤی كوردستان بڵاوكراوەتەوە، ئاماژە بەوەكراوە، كە بە تۆمەتی ئەنجامدانی تەقینەوەیەك لە نمایشێكی سەربازی لە شاری مەهاباد، دەزگای دادوەری ئێران سزای لە سێدارەدانی بەسەر سێ گەنج بە ناوەكانی سابیر شێخ عەبدوڵا، دیاكۆ رەسوڵزادە و حسێن عوسمانیدا سەپاندووە.
تەقینەوەكە مانگی تشرینی یەكەمی ساڵی 2009 روویداوە و ئەو سێ گەنجە سێ ساڵ دواتر دەستگیركراون، وەك كۆمەڵەی مافی مرۆڤ باسی لێوەركردووە، دوابەدوای تەقینەوەكەی مەهاباد، حەیدەر موسڵیحی وەزیری ئیتلاعاتی ئێران رایگەیاندبوو، كە ئەنجامدەرانی تەقینەوەكە دەستنیشان كراون و بەم نزیكانە بە سزای خۆیان دەگەن، چەند رۆژ دواتریش عەبدولرەسوڵ مەحمودئابادی فەرماندەی قەرارگای هەمزەی ورمێ باسی لەوەكردووە، كە توانیویانە 30 ئەنجامدەری تەقینەوەكە كە دوانیان سەر بە حزبی بەعس بوون بكوژن.
خاڵێكی تری ناتەبا كە كۆمەڵەی مافی مرۆڤی كوردستان ئاماژەی پێكردووە بریتیە لەوە كە بەپێچەوانەی بانگەشەی هێزە ئەمنیەكان، ئەو سێ كەسە نەك پێكەوە و لە یەك شوێن، بەڵكوو لە سێ كاتی جیاجیا و لە شوێنی جیاجیا دەستبەسەر كراون.
كۆمەڵەی مافی مرۆڤ بە ئاماژەدان بەوەی پێشتریش بە تۆمەتی ساختە ئێران چەند زیندانیەكی كوردی لە سێدارەداوە، داوای لە حزب و لایەنە كوردستانی و رێكخراوە نێودەوڵەتیەكان كردوە، كار بكەن بۆ رزگاركردنی گیانی ئەو سێ گەنجە كوردە.
No comments:
Post a Comment